Dijòus 2 de julhet, l’IEO 31 organizèt la serada de fin d’annada dels estudiants a l’Ostal del Departament a Tolosa. Un centenat de personas participèron a aquela fèsta.
La serada comencèt amb lo Jòc de Lenga: lo principi èra de far parlar dos estudiants en cap e cap pendent 5 minutas puèi de charrar amb qualqu’un mai apuèi.
A 19:00 direccion la sala de l’Assemblada per un temps de paraulas e tanben la remesa dels certificats. L’universitària japonesa Naoko Sano faguèt un polit discors per explicar sa preséncia a Tolosa pendent un an e tanben son trabalh de recèrcas. Giraud Delbeç faguèt un bilanç pedagogic de l’annada (174 estudiantas e estudiants, siá una augmentacion de 28% respècte a l’an passat). Èra l’ocasion tanben d’evocar la convencion entre l’IEO 31 e l’Universitat Tolosa Joan Jaurés qu’es en aplicacion dempuèi 20 ans. Los nòstres estudiants que passan las avaloracions, pòdon obténer per cada nivèl, d’equivaléncias en Unitat d’Ensenhament de la licéncia d’occitan de l’Universitat Joan Jaurés.
Los elegits Bernat Banherins (Conselh Departamental de la Garona Nauta) e Joan-Miquèl Latas (Comuna de Tolosa e Tisséo Collectivitats) prenguèron tanben la paraula. Fin finala, Rafèu Sichel-Bazin de l’Universitat Joan Jaurés faguèt la remesa dels certificats als estudiants de l’IEO 31.
La serada se contunhèt amb l’aperitiu manja dreit qu’ofriguèt l’IEO 31 puèi amb una polida cantèra que menèt Joël Sitbon. La nòstra librariá de la Tuta d’Òc èra presenta e las gents poguèron crompar de libres. Regraciam lo Conselh Departamental de la Garona Nauta per nos aver recebuts e ajudats per organizar aquela bèla serada. Òsca a cada persona presenta arser e al plaser d’aculhir tornarmai los nòstres estudiants en cors l’an que ven.
