Las temperaturas davalan, lo solelh s’escond… De segur la davalada arriba. Bona novèla, lo Festival Occitania es a tornar ! Ongan vos prepausam mai de vint eveniments per demorar plan cauds en tot descobrir çò qu’Occitania a de melhor en matèria de creacion actuala. E n’avem per totes los gostes que lo festenal se vòl dobèrt a totas e totes : literatura, contes, teatre, istòria, musica, dança, cinemà… Portat per l’IEO 31 e afortit de partenariats amb d’associacions localas e occitanas, vos convidam a vos venir banhar dins la lenga e la cultura nòstras.
Lançam lo festenal en granda pompa a l’escasença de las Jornadas Europencas del Patrimòni los 21 e 22 de setembre al musèu Sant-Ramon, ont se tendrà un vilatge occitan. S’i podràn trapar d’activitats sus tota la dimenjada. Lo dissabte, auretz una iniciacion a l’occitan prepausada per Ioan Algans, una presentacion de l’accion de l’IEO OPM amb de pòdcastes, la revista Lo Diari e La Galariá, una animacion musicala amb Brancaleone, e s’acabarà amb una visita del musèu en occitan per Renaud Savy. Lo dimenge, una novèla iniciacion a l’occitan serà possibla, tan coma de contes amb Alan Vidal, seguida per la descobèrta d’instruments medievals amb Samuel Méric, e un mix de viniles occitans amb Varalh Prod.
L’espectacle viu serà a l’onor per aquela edicion del Festival Occitania ! La Comèdia Occitana Tolzana vos va poder presentar sa peça novèla Embrolhs a la Palanca, e lo Florant Mercadier vendrà jogar sa plan famosa L’Occitanie pour les nuls. De son costat, Christophe Calmettes fara una representacion de la peça Un tròç de camin, adaptada de l’òbra La Grava sul camin de Joan Bodon.
L’occitan, es tanben un afar de literatura ! Per aquò retrobarem Gérard Zuchetto, Paulina Kamakine e Franc Bardòu per una lectura poëtica de L’àngel que renais, Miquèla Stenta per presentar Marcelle Delpastre à fleur de l’âme, Eric Fraj en encontre literari musical per son libre-CD novèl Parle a un pòble, que met en musica l’òbra de Robèrt Lafont. Puèi, Daidièr Mir serà convidat pel Cercle Occitan de Carbona per presentar son libre e son filme Leis inaudibles, acompanhat d’una projeccion, que contan l’istòria del vilatge de Bròve dins Var, voidat per l’armada francesa dins la annadas 70.
Per profiechar, cal tanben poder festejar, dançar e cantar ! E avèm de que far, amb lo fest-noz balèti annadièr de Breizh en Òc a Cunhaus que convida Zoñj, Totis Tres e lo Bagad bro Tolosa. A Senta Gabèla, es Coquelicot de Fogo que ven jogar a l’escasença de la Fèsta Occitana portada per l’associacion Caminòc e lo Sindicat d’Iniciativa de Senta Gabèla, ont se tendrà tanben l’inquet. E a la fin del mes, podretz celebrar la fèsta de la Martror a Pinsaguèl, mercés als Pescofis de Pinsaguèl e al cafè La Grande Famille, amb lo duò Salvatjonas.
Enfin, pas de festenal sens concèrt ! Vos prepausam doncas lo duò Arizonà (trad acostic) a la Gougnotte per l’estrena de la mòstra camp liure de l’artista Laurí Privat, Varalh Balèti (ragga balèti) a l’Évasion, lo duò Lavoà Lapò (cant e percussions) a la Cave Poésie, DiLOUvienne e son concèrt-balèti novèl Esclafi a l’Astronef, Rodín (rap hip hop) e Louie Z (pop modulara) al cabaret Le 9, MC KER.6 (bal blédart) e lo Transe-òc vinil mix al DAda. Lo festenal s’acabarà amb los concèrts de De La Crau (transida poëtica pòst-ròck) e Dus Au Casau (balèti cosmic) lo 2 de novembre al cabaret Le 9.
